[New search]
[Help]
OFFERYNNAU STATUDOL
2006 Rhif 2825 (Cy.248)
TAI, CYMRU
Gorchymyn Trwyddedu Dethol Tai (Amodau Ychwanegol) (Cymru) 2006
| |
Wedi'i wneud |
25 Hydref 2006 | |
| |
Yn dod i rym |
26 Hydref 2006 | |
Mae Cynulliad Cenedlaethol Cymru, drwy arfer y pwerau a roddwyd iddo gan adran 80(7) o Ddeddf Tai 2004[1], yn gwneud y Gorchymyn a ganlyn:
Enwi, cychwyn a chymhwyso
1.
—(1) Enw'r Gorchymyn hwn yw Gorchymyn Trwyddedu Dethol Tai (Amodau Ychwanegol) (Cymru) 2006 a daw i rym ar 26 Hydref 2006.
(2) Mae'r Gorchymyn hwn yn gymwys i dai ac anheddau[2] y mae Rhan 3 o'r Ddeddf yn gymwys iddynt o ran Cymru.
Dehongli
2.
Yn y Gorchymyn hwn—
(a) ystyr "y Ddeddf" ("the Act") yw Deddf Tai 2004;
(b) ystyr "Deddf 1989" ("the 1989 Act") yw Deddf Llywodraeth Leol a Thai 1989[3]; ac
(c) ystyr "Gorchymyn 2002" ("the 2002 Order") yw Gorchymyn Diwygio Rheoleiddio (Cymorth Tai) (Cymru a Lloegr) 2002[4].
Amodau Ychwanegol
3.
—(1) Yn ddarostyngedig i baragraff (2), at ddibenion adran 80(2)(b) o'r Ddeddf mae naill ai'r amod cyntaf neu'r ail amod yn gymwys—
(a) yr amod cyntaf yw, naill ai bod
(i) awdurdod tai lleol wedi datgan ardal yn ardal adnewyddu o dan adran 89 o Ddeddf 1989; neu
(ii) awdurdod tai lleol wedi darparu cymorth i unrhyw berson yn unol â pholisi a fabwysiadwyd ac a gyhoeddwyd o dan erthyglau 3 a 4 o Orchymyn 2002 yn yr ardal honno (pŵer awdurdodau tai lleol i ddarparu cymorth);
(b) yr ail amod yw bod ardal ei ddosbarth neu'r ardal yn ei ddosbarth yn cynnwys lleiafswm o 25% o'r stoc dai a osodir gan landlordiaid y sector preifat[5].
(2) Rhaid i awdurdod tai lleol fod yn fodlon bod y naill neu'r llall o'r amodau a osodir o dan is-baragraff (a) neu (b) o baragraff (1) wedi'u bodloni cyn dynodi ardal ei ddosbarth neu ardal yn ei ddosbarth yn ardal sy'n ddarostyngedig i drwyddedu dethol.
Llofnodwyd ar ran y Cynulliad Cenedlaethol Cymru o dan adran 66(1) o Ddeddf Llywodraeth Cymru 1998[6].
D. Elis-Thomas
Llywydd y Cynulliad Cenedlaethol
25 Hydref 2006
NODYN ESBONIADOL
(Nid yw'r nodyn hwn yn rhan o'r Gorchymyn)
Mae adran 80 o Ddeddf Tai 2004 ("y Ddeddf") (Dynodi ardaloedd trwyddedu dethol) yn caniatáu i awdurdod tai lleol ddynodi naill ai ardal ei ddosbarth neu ardal yn ei ddosbarth yn ardal sy'n ddarostyngedig i drwyddedu dethol os bodlonir gofynion is-adrannau (2) a (9).
Mae adran 80, is-adran (7) o'r Ddeddf yn caniatáu i Gynulliad Cenedlaethol Cymru ddarparu, ar gyfer unrhyw amodau a bennir mewn gorchymyn, eu bod yn gymwys fel set ychwanegol o amodau at ddibenion is-adran (2). Mae is-adran (2) yn darparu bod rhaid i'r awdurdod ystyried bod y set gyntaf o amodau cyffredinol neu'r ail set o amodau cyffredinol a grybwyllir yn is-adran (3) neu (6), neu unrhyw amodau a bennir mewn gorchymyn o dan is-adran (7) fel set ychwanegol o amodau yn cael eu bodloni o ran yr ardal.
Mae erthygl 3 o'r Gorchymyn hwn yn gosod yr amodau ychwanegol y mae'n rhaid eu bodloni cyn i awdurdod tai lleol ddynodi ardal ei ddosbarth neu ardal yn ei ddosbarth yn ardal sy'n ddarostyngedig i drwyddedu dethol.
Mae arfarniad rheoliadol o'r effaith a fydd gan y Gorchymyn hwn ar gael oddi wrth yr Uned Sector Preifat, yr Adran Cyfiawnder Cymdeithasol ac Adfywio, Cynulliad Cenedlaethol Cymru, Parc Cathays, Caerdydd CF10 3NQ (ffôn: 02920825111); e-bost: [email protected]).
Notes:
[1]
2004 p.34. Mae'r pwerau a roddwyd gan adran 80(7) o'r Ddeddf yn arferadwy o ran Cymru gan Gynulliad Cenedlaethol Cymru. Gweler y diffiniad o "the appropriate national authority" yn adran 261(1).back
[2]
Am ystyr "house" a "dwelling", gweler adran 99 o'r Ddeddf.back
[3]
1989 p.42.back
[4]
Gweler O.S. 2002/1860.back
[5]
Nid yw "landlord sector cyhoeddus" yn cynnwys "landlord cymdeithasol cofrestredig" o fewn ystyr "registered social landlord" yn Rhan 1 o Ddeddf Tai 1996 (p.52).back
[6]
1998 p.38.back
English version
ISBN
0 11 091422 8
| © Crown copyright 2006 |
Prepared
1 November 2006
|
BAILII:
Copyright Policy |
Disclaimers |
Privacy Policy |
Feedback |
Donate to BAILII
URL: http://www.bailii.org/wales/legis/num_reg/2006/20062825w.html
