Enwi, cymhwyso a chychwyn

1.–(1) Enw'r Rheoliadau hyn yw Rheoliadau Labelu Pysgod (Cymru) 2010.

(2) Mae'r Rheoliadau hyn yn gymwys o ran Cymru a deuant i rym ar 6 Ebrill 2010.

Dehongli

2. Yn y Rheoliadau hyn–

• ystyr "Rheoliad 104/2000" ("Regulation 104/2000") yw Rheoliad y Cyngor (EC) Rhif 104/2000 ar gyd-drefniadaeth y marchnadoedd mewn cynhyrchion pysgodfeydd a dyframaethu(4);

• ystyr "Rheoliad 2065/2001" ("Regulation 2065/2001") yw Rheoliad y Comisiwn (EC) Rhif 2065/2001 sy'n gosod rheolau manwl ar gymhwysiad Rheoliad y Cyngor (EC) Rhif 104/2000 o ran hysbysu defnyddwyr am gynhyrchion pysgodfeydd a dyframaethu(5);

ac mae i unrhyw ymadroddion a ddefnyddir yn y Rheoliadau hyn yr un ystyr ag a roddir i'r ymadroddion Saesneg cyfatebol yn Rheoliad 104/2000 neu Reoliad 2065/2001.

Tramgwyddau sy'n ymwneud â hysbysu defnyddwyr

3.–(1) Bydd unrhyw berson sydd, yn groes i Erthygl 4.1 o Reoliad 104/2000 (gwybodaeth i ddefnyddwyr) o'i darllen ynghyd â Rheoliad 2065/2001, yn cynnig ar gyfer eu hadwerthu i'r defnyddiwr terfynol unrhyw un o'r cynhyrchion y mae'r Erthygl honno yn gymwys iddynt yn euog o dramgwydd ac yn agored ar gollfarn ddiannod i ddirwy heb fod yn fwy na lefel 5 ar y raddfa safonol.

(2) Bydd unrhyw berson sy'n methu â chydymffurfio ag Erthygl 8 o Reoliad 2065/2001 (olrhain a rheoli) yn euog o dramgwydd ac yn agored ar gollfarn ddiannod i ddirwy nad yw'n fwy na lefel 3 ar y raddfa safonol.

Rhestrau o ddynodiadau masnachol

4.–(1) O ran Cymru, y rhestr o ddynodiadau masnachol y mae'n ofynnol i'r Deyrnas Unedig ei llunio a'i chyhoeddi o dan Erthygl 4.2 o Reoliad 104/2000 yw'r un a nodir yn y tabl yn yr Atodlen i'r Rheoliadau hyn fel y'i darllenir gyda'r nodiadau iddo, ac yn unol â hynny, y dynodiadau masnachol a bennir yn yr Atodlen honno yw'r enwau a ragnodir gan y gyfraith at ddibenion rheoliadau 6(1), 7 ac 8(a) o Reoliadau Labelu Bwyd 1996 i'r graddau y maent yn gymwys o ran Cymru(6).

(2) Mewn perthynas â rhywogaeth a gynhwysir yn yr Atodlen i'r Rheoliadau hyn ac mewn rhestr a gyhoeddwyd yn Saesneg o dan Erthygl 4.2 o Reoliad 104/2000 sy'n cael effaith mewn Aelod-wladwriaeth arall neu mewn rhan arall o'r Deyrnas Unedig, bydd y dynodiad masnachol ar gyfer y rhywogaeth honno yn y rhestr sy'n cael effaith yn yr Aelod-wladwriaeth arall honno neu'r rhan honno o'r Deyrnas Unedig yn un amgen i'r dynodiad masnachol ar gyfer y rhywogaeth honno a nodir yn yr Atodlen i'r Rheoliadau hyn ac maent yn enwau a ragnodir gan y gyfraith at y dibenion a bennir ym mharagraff (1).

Hepgor cyfeirio at y dull cynhyrchu

5. Yn yr achos a ddisgrifir yn Erthygl 4.2 o Reoliad 2065/2001 (sefyllfa lle y mae'n amlwg oddi wrth y dynodiad masnachol a chylch y ddalfa fod y rhywogaeth yn cael ei dal yn y môr) ni fydd yn groes i Erthygl 4.1 o Reoliad 104/2000 i gynnig ar gyfer ei adwerthu i'r defnyddiwr terfynol gynnyrch y mae'r Erthygl honno yn gymwys iddo heb fod y cynnyrch wedi'i farcio neu wedi'i labelu â'r dull cynhyrchu.

Meintiau bach o gynhyrchion

6.–(1) At ddibenion Erthygl 4.1 o Reoliad 104/2000 o'i darllen ynghyd ag Erthygl 7 o Reoliad 2065/2001, rhaid i'r meintiau bach o gynhyrchion y caniateir eu gwerthu'n uniongyrchol i ddefnyddwyr fod yn gynhyrchion na fydd eu gwerth yn uwch nag 20 Ewro am bob pryniant.

(2) At ddibenion y Rheoliad hwn, bernir bod y cyfeiriad at 20 Ewro yn gyfeiriad at werth cyfatebol y nifer hwnnw o Ewros mewn sterling, wedi'u trosi drwy gyfeirio at y gyfradd drosi a gyhoeddir yn flynyddol ar ddiwrnod gwaith cyntaf y mis Medi blaenorol yng nghyfres C o Gyfnodolyn Swyddogol y Cymunedau Ewropeaidd neu, os na chyhoeddir cyfradd ynddo ar y diwrnod hwnnw, y gyfradd a gyhoeddir ynddo gyntaf ar ôl hynny.

Gwybodaeth ychwanegol sy'n ymwneud â chylch y ddalfa

7. Caiff y mynegiad o gylch y ddalfa sy'n ofynnol o dan Erthygl 4.1(c) o Reoliad 104/2000, os yw'r amgylchiadau a ddisgrifir yn Erthygl 5.1(c) o Reoliad 2065/2001 yn gymwys, fynegi'r amryw Aelod-wladwriaethau neu drydydd gwledydd y cafodd y cynnyrch ei ffermio ynddynt.

Dynodiadau masnachol dros dro

8.–(1) At ddibenion Erthygl 2 o Reoliad 2065/2001 (dynodiadau masnachol dros dro), yr Asiantaeth Safonau Bwyd yw'r awdurdod cymwys.

(2) Rhaid i'r Asiantaeth Safonau Bwyd lunio a chyhoeddi rhestr o ddynodiadau masnachol dros dro a osodir yn unol ag Erthygl 2.

Gorfodi

9. Rhaid i bob awdurdod bwyd orfodi a gweithredu'r Rheoliadau hyn o fewn ei ardal.

Cymhwyso amryw ddarpariaethau Deddf Diogelwch Bwyd 1990

10. Bydd darpariaethau canlynol Deddf Diogelwch Bwyd 1990 ("y Ddeddf") yn gymwys at ddibenion y Rheoliadau hyn gyda'r addasiad y dehonglir unrhyw gyfeiriad yn y darpariaethau hynny at y Ddeddf neu Ran o'r Ddeddf yn gyfeiriad at y Rheoliadau hyn ac at y darpariaethau hynny yn Rheoliad 104/2000 a Rheoliad 2065/2001 y mae'r Rheoliadau hyn yn ymwneud â hwy–

(a) adran 3 (rhagdybiaeth bod bwyd wedi'i fwriadu ar gyfer ei fwyta gan bobl);

(b) adran 20 (tramgwyddau oherwydd bai person arall);

(c) adran 21 (amddiffyniad diwydrwydd dyladwy)(7) gyda'r addasiad bod is-adrannau (2) i (4) yn gymwys mewn perthynas â thramgwydd o dan reoliad 3(1) fel y maent yn gymwys mewn perthynas â thramgwydd o dan adran 14 neu 15;

(ch) adran 30(8) (sy'n ymwneud â thystiolaeth ddogfennol);

(d) adran 33(1) (rhwystro etc. swyddogion);

(dd) adran 33(2) gyda'r addasiad y bernir bod y cyfeiriad at "any such requirement as is mentioned in subsection (1)(b) above" yn gyfeiriad at unrhyw ofyniad o'r fath a grybwyllir yn yr is-adran honno fel y'i cymhwysir gan baragraff (d);

(e) adran 35(1) (cosbi tramgwyddau)(8) i'r graddau y mae'n ymwneud â thramgwyddau o dan adran 33(1) fel y'i cymhwysir gan baragraff (d);

(f) adran 35(2) a (3)(9) i'r graddau y mae'n ymwneud â thramgwyddau o dan adran 33(2) fel y'i cymhwysir gan baragraff (dd);

(ff) adran 36 (tramgwyddau gan gyrff corfforaethol);

(g) adran 36A (tramgwyddau gan bartneriaethau Albanaidd)(10); ac

(ng) adran 44 (amddiffyn swyddogion sy'n gweithredu'n ddidwyll).

Dirymu

11. Dirymir y Rheoliadau canlynol–

(a) Rheoliadau Labelu Pysgod (Cymru) 2003(11); a

(b) Rheoliadau Labelu Pysgod (Diwygio) (Cymru) 2006(12).

Rheoliad 4

YR ATODLEN Dynodiadau Masnachol

1. Yn ddarostyngedig i baragraffau 2 a 3, y dynodiad masnachol ar gyfer unrhyw rywogaeth o bysgod a bennir yng ngholofn 2 o'r Tabl canlynol fydd enw a bennir ar gyfer y rhywogaeth honno yn y cofnod cyfatebol yng ngholofn 1.

2. Caniateir defnyddio enw arferol ar gyfer unrhyw rywogaeth o bysgod sydd wedi cael eu mygu neu gael eu rhoi drwy broses debyg, onid yw enw'r rhywogaeth yng ngholofn 2 o'r Tabl yn cael ei ddilyn gan seren. Yn yr achosion hynny, yr enw a ddefnyddir ar gyfer y bwyd pan fydd y pysgod wedi eu mygu fydd enw a bennir ar gyfer y rhywogaeth honno yng ngholofn 1 o'r Tabl a enwyd gyda'r geiriau "wedi'i fygu" neu "wedi'u mygu" ar ei ôl.

3. Ni fydd paragraff 1, o'i ddarllen ynghyd â'r Tabl, yn gymwys i bysgod a reoleiddir gan Reoliad y Cyngor (EEC) Rhif 2136/89 sy'n gosod safonau marchnata cyffredin ar gyfer sardîns wedi'u preserfio a disgrifiadau masnachol ar gyfer sardîns wedi'u preserfio a chynhyrchion o fath sardîns wedi'u preserfio(13) (fel y'i diwygiwyd gan Reoliad y Comisiwn (EC) Rhif 1181/2003(14) a Rheoliad y Comisiwn (EC) Rhif 1345/2008(15)) neu Reoliad y Cyngor (EEC) Rhif 1536/92 sy'n gosod safonau marchnata cyffredin ar gyfer tiwna a bonito wedi'u preserfio(16).

Nodyn Esboniadol

(Nid yw'r nodyn hwn yn rhan o'r Rheoliadau)

1. Mae'r Rheoliadau hyn, sy'n gymwys o ran Cymru, yn darparu ar gyfer gweithredu a gorfodi Teitl I, Pennod 2 (gwybodaeth i'r defnyddiwr) o Reoliad y Cyngor (EC) Rhif 104/2000 ar gyd-drefniadaeth y marchnadoedd mewn cynhyrchion pysgodfeydd a chynhyrchion dyframaethu (OJ Rhif L17, 21.2.2000, t.22) fel y'i cymhwysir gan Reoliad y Comisiwn (EC) Rhif 2065/2001 sy'n gosod rheolau manwl ar gyfer cymhwyso Rheoliad y Cyngor (EC) Rhif 104/2000 ynglŷn â hysbysu defnyddwyr ynghylch cynhyrchion pysgodfeydd a chynhyrchion dyframaethu (OJ Rhif L278, 23.10.2001, t.6).

2. Mae Teitl I o Bennod 2 o Reoliad y Cyngor (EC) Rhif 104/2000 yn gosod gofynion ynghylch darparu gwybodaeth am ddynodiad masnachol, dull cynhyrchu a chylch dalfa cynhyrchion pysgodfeydd a chynhyrchion dyframaethu penodol sy'n cael eu cynnig ar gyfer eu hadwerthu i'r defnyddiwr terfynol. Mae'n darparu ymhellach i Aelod-wladwriaethau lunio a chyhoeddi rhestr o ddynodiadau masnachol ar gyfer o leiaf y rhywogaethau a restrir yn Atodiadau I i IV o'r Rheoliad. Mae Rheoliad y Comisiwn (EC) Rhif 2065/2001 yn disgrifio'n fanylach yr wybodaeth sydd i'w darparu i ddefnyddwyr a'r esemptiadau y ceir eu caniatáu. Mae'n darparu hefyd ynglŷn â'r wybodaeth angenrheidiol sydd i'w darparu ym mhob cyfnod o'r broses farchnata.

3. Mae'r Rheoliadau hyn:

(a) yn darparu rhestr wedi'i diweddaru o'r dynodiadau masnachol y mae'n ofynnol i'r Deyrnas Unedig eu llunio (rheoliad 4 a'r Atodlen) ac yn darparu ymhellach ar gyfer caniatáu dynodiadau masnachol dros dro (rheoliad 8);

(b) yn darparu ar gyfer y rhanddirymiad yn Erthygl 4.2 o Reoliad (EC) Rhif 2065/2001 (yr amgylchiadau pan ganiateir i gynhyrchion pysgodfeydd gael eu gwerthu i'r defnyddiwr terfynol heb fod wedi'u marcio na'u labelu gyda'r dull cynhyrchu) (rheoliad 5);

(c) yn unol ag Erthygl 7 o Reoliad (EC) Rhif 2065/2001, yn penderfynu beth sy'n ffurfio "meintiau bach o gynhyrchion a werthir yn uniongyrchol i ddefnyddwyr" at ddibenion cymhwyso'r rhanddirymiad yn Erthygl 4.1 o Reoliad (EC) Rhif 104/2001 (rheoliad 6);

(ch) yn darparu y caiff y mynegiad o gylch y ddalfa sy'n ofynnol gan Erthygl 4.1(c) o Reoliad (EC) Rhif 104/2001, yn unol ag Erthygl 5(1)(c) o Reoliad (EC) Rhif 2065/2001, fynegi yr amrywiol Aelod-wladwriaethau neu drydydd gwledydd y cafodd y cynnyrch ei ffermio ynddynt (rheoliad 7);

(d) yn creu tramgwyddau a rhagnodi cosbau (rheoliad 3), yn pennu awdurdodau gorfodi (rheoliad 9) ac yn cymhwyso, gydag addasiadau, ddarpariaethau penodol yn Neddf Diogelwch Bwyd 1990 (rheoliad 10); ac

(dd) yn dirymu Rheoliadau Labelu Pysgod (Cymru) 2003 (O.S. 2003/635 (Cy.177)) a Rheoliadau Labelu Pysgod (Diwygio) (Cymru) 2006 (O.S. 2006/1339 (Cy.131)) (rheoliad 11).

Mae asesiad effaith rheoleiddiol llawn wedi'i wneud mewn perthynas â'r Rheoliadau hyn ac mae ar gael gan yr Asiantaeth Safonau Bwyd, Llawr 11, Southgate House, Wood Street, Caerdydd, CF10 1EW.